اسلام آباد (نوائے وقت رپورٹ) سرکاری حج سکیم کی پروازوں کا شیڈول جاری کر دیا گیا۔ وزارت مذہبی امور کے مطابق پہلی حج پرواز 14 جولائی کو حجاز مقدس روانہ ہو گی پہلے دن پشاور، اسلام آباد، لاہور، سکھر اور کراچی سے پروازیں روانہ ہوں گی۔ اسلام آباد سے پی آئی اے کی پہلی پرواز صبح 7 بجے روانہ ہوگی۔ کراچی سے پی ٹی آئی کی پہلی پرواز صبح2 بج کر 25 منٹ پر روانہ ہو گی۔ ملتان سے پہلی حج پرواز 15 جولائی کو 180 عازمین حج کو لے کر روانہ ہو گی۔ فیصل آباد سے جدہ کے لئے پہلی پرواز17 جولائی کو روانہ ہو گی۔ پہلے دو دن 1550 عازمین حج مدینہ منورہ روانہ کئے جائیں گے۔ حجاج کرام کی وطن واپسی 28 اگست کو شروع ہو گی۔ عازمین حج اپنا شیڈول ایس ایم ایس اور ویب سائٹ پر دیکھ سکیں گے۔ حاجی کیمپوں پر ویکسین کا عمل پہلے ہی شروع کر دیا گیا ہے۔ عازمین حج کو اپنی پرواز سے دو دن قبل حاجی کیمپ پہنچنے کی ہدایات کی گئیں جب کہ پاسپورٹ، ٹکٹ اور گلے کے لاگٹ متعلقہ حاجی کیمپ پر مہیا کئے جائیں گے۔