لاہور (نیوز ڈیسک) پاکستان میں تعینات جرمنی کے سفیر مارٹن کوبلر نے شندور میلے اور پولو فیسٹیول کو سیاحت کے زبردست مقام اور تقریب قرار دے دیا۔ مارٹن کوبلر نے سماجی رابطے کی ویب سائٹ ٹوئٹر پر شندور میلے کی تصاویر شائع کیں اور کہا کہ انہوں نے ایسا بہترین میلا کبھی نہیں دیکھا۔ ان کے ساتھ جرمن نمائندہ برائے امور نوجوانان ماریئن فیننگز بھی موجود تھیں۔ مارٹن کوبلر نے شندور میلے اور گلگت بلتستان کے حوالے سے کہا کہ یہاں شاندار اور خوبصورت نظارے موجود ہیں اور یہاں کا ماحول بھی شاندار ہے۔ ان کا مزید کہنا تھا کہ پاکستان کا شمالی علاقہ سیاحت کے لیے بہت زبردست مقام ہے۔ اس دوران جرمن سفیر نے میلے میں لگائے گئے کھانوں کے سٹال کا بھی دورہ کیا وہاں موجود کھانوں سے بھی محظوظ ہوئے۔ ایک سٹال پر فالودہ کھاتے ہوئے ان کا کہنا تھا کہ انہیں پاکستان میں دوروں کے دوران مختلف مقامات پر رکنے اور مقامی کھانے کھانے کا شوق ہے۔