ملکی دفاع پر سمجھوتہ نہیں ہوگا: چیف جسٹس، حساس ادارے کی عمارت کے قریب تعمیرات گرانے کا حکم

اسلام آباد(خصوصی رپورٹر) سپریم کورٹ میں حساس ادارے کی عمارت کے قریب اراضی خریدنے سے متعلق کیس کی سماعت کے دوران چیف جسٹس پاکستان آصف سعید کھوسہ نے ریمارکس دیتے ہوئے کہا ہے کہ ملکی دفاع کے معاملے پر کوئی سمجھوتا نہیں ہوگا، عدالت نے عمارت کے قریب تعمیرات گرانے کا حکم دیتے ہوئے اہل علاقہ کی درخواست مستردکردی۔ سپریم کورٹ نے حکم دیا کہ سی ڈی اے اور متعلقہ ادارے غیر قانونی تعمیرات فوری طور پر ختم کریں، عدالتی احکامات پر اصل روح کے مطابق عمل کیا جائے، ایٹمی اثاثوں کی وجہ سے ہی پاکستان محفوظ ہے، ملکی دفاع کے معاملے پر کوئی سمجھوتا نہیں ہوگا۔ چیف جسٹس نے پوچھا کہ سی ڈی اے غیر قانونی تعمیرات کیوں ختم نہیں کر رہا، کون ہے چئیرمین سی ڈی اے؟، کیا آپ نے غیر قانونی تعمیرات پر بم مارنا ہے، اگر عدالتی احکامات پر عمل نہ ہوا تو نظرثانی نہیں توہین عدالت کا کیس سنیں گے۔ جسٹس گلزار نے کہا کہ ابھی بلڈوزر لے کر جائیں اور جگہ کلئیر کرائیں۔ جسٹس عظمت سعید شیخ نے کہا کہ جو خلاف ورزیاں ہونا تھیں ہو گئیں، اب نہیں ہوں گی۔