گوجرانوالہ:تاجروں کی بیرسٹر عثمان ابراہیم،شاہد عثمان سے ملاقات 

گوجرانوالہ(نمائندہ خصوصی )گوجرانوالہ چیمبر آف کامرس اینڈ انڈسٹری(بزنس گروپ)کی قیادت نے سینئر سیاستدان و سابق وفاقی وزیر بیرسٹر عثمان ابراہیم، قومی اسمبلی کے رکن شاہد عثمان اور اسلم ابراہیم سے ملاقات کی اور بزنس کمیونٹی کی مشکلات کے خاتمہ اور چیمبر آف کامرس کی بہتری کیلئے مل کر چلنے کی درخواست کی، بیرسٹر عثمان ابراہیم نے کہا کہ کاروباری برادری کے مسائل حل کیلئے وہ ہر وقت دستیاب ہیں اور گوجرانوالہ چیمبر کی ترقی اور ترویج ان کیلئے بھی بڑی اہمیت رکھتی ہے، علاوہ ازیں بزنس گروپ کی قیادت نے صغیر شہید پارک نوشہرہ روڈ سے ملحقہ سرکاری اراضی پر ہسپتال تعمیر کرنے کے منصوبہ کو عوام دوست پراجیکٹ قرار دیا ہے اور اس حوالے سے شاہد عثمان ابراہیم ایم این اے کو خراج تحسین پیش کیا ہے جنہوں نے شہریوں کی اس ناگزیر ضرورت کا احساس کرتے ہوئے حکومت کو اس ضمن میں قابل قدر تجویز پیش کی ہے ،بزنس گروپ رہنمائوں نے مزید کہا ہے کہ اسی طرح کے پراجیکٹ کی امید رکھتے ہیں جس سے عام آدمی کی مشکلات کا ازالہ ہو اور لوگوں کو علاج معالجہ کی بڑی سہولت ملے۔