لاہور(سپورٹس رپورٹر) پاکستان کرکٹ بورڈ نے جونیئر سلیکشن کمیٹی کی سفارشات پر انڈر 16 ایڈوانس کوچنگ پروگرام کے لئے 25 کھلاڑیوں کے ناموں کا اعلان کر دیا۔ سینئر ٹیم کے چیف سلیکٹر معین خان کا بیٹا جونیئر سلیکشن کمیٹی کا اعتماد حاصل نہ کر سکا۔ جونیئر سلیکشن کمیٹی نے مشروب ساز ادارے اور پی سی بی کے اشتراک سے پی سی بی سٹار کرکٹ پروگرام کے کھلاڑیوں کو تین روزہ ٹرائل کے بعد منتخب کیا جن کا تربیتی کیمپ این سی اے کے کوچز کے زیر نگرانی آج سے نیشنل کرکٹ اکیڈمی لاہور میں شروع ہوگا جو 27 جون تک جاری رہے گا۔  منتخب کھلاڑیوں میں عماد عالم، ایم حسن خان، سعد زاہد، محمد عمر، انس حمید (کراچی)، عزیر جعفری، سید عریش جعفری، محمد ابتشام (حیدرآباد)، نجید راحیل (سیالکوٹ)،  منصور علی (ایبٹ آباد)،اکرام اﷲ خان (اسلام آباد)، ہدایت اﷲ (کوئٹہ)، اسامہ رزاق (ڈیرہ مراد جمالی)، غلام محمد (لاڑکانہ)، ذیشان بابر (فیصل آباد)، وصی الحسن، حمزہ خان (بہاولپور)، احمد حسن، محمد عمر (لاہور)، احمد سلطان، راؤ عرفان، عمر صدیق، فراز خان، راؤ حمزہ اور منیب الرحمان (ملتان) شامل ہیں۔