لاہور (سپورٹس رپورٹر+ نمائندہ سپورٹس) قومی کرکٹ ٹیم کے ہیڈ کوچ مکی آرتھر نے گزشتہ روزچیئرمین پی سی بی سے ملاقات کی ہے۔ شہریار خان نے کوچ کو ہدایت کی ہے کہ دورہ انگلینڈ میں ڈسپلن پر کوئی سمجھوتہ نہ کیا جائے۔تفصیلات کے مطابق لاہور میں پی سی بی ہیڈ کوارٹر میں چیئرمین پی سی بی اور ہیڈ کوچ کے مابین ہونیوالی ملاقات چالیس منٹ تک جاری رہی۔ ملاقات میں ٹیم کے دورہ انگلینڈ کے حوالے سے حکمت عملی زیر بحث آئی۔ شہر یار خان نے ہیڈ کوچ کو ہدایت کی کہ کسی کھلاڑی کے ساتھ ڈسپلن کے معاملے پر کوئی رعایت نہ برتی جائے۔شہریار خان نے کہا کہ دورہ انگلینڈ میں کامیابی کیلئے ڈسپلن کا اہم کردار ہو گا۔ مکی آرتھر نے دیگر کوچنگ اسٹاف سے بھی ملاقات کی۔