لاہور(کامرس رپورٹر) ترجمان پی آئی اے نے کہاہے کہ پی آئی اے نے فیصل آباد اور کراچی کے درمیان فضائی رابطہ بحال کر دیا۔7 ماہ کے بعد پی آئی اے کی پہلی پرواز کراچی اور فیصل آباد کے درمیان آپریٹ کی گئی۔ دونوں شہروں کے درمیان پی آئی اے ہفتہ وار 4 پروازیں چلائے گی۔پہلی پرواز سے 170 مسافر روانہ ہوئے۔ان پروازوں کے اجراء سے فیصل آباد سے براستہ کراچی بیرون ملک سفر کرنے والے مسافروں کو بھی سہولت میسر آئے گی۔ان پروازوں کی دوربارہ شروعات سے فیصل آباد کی کاروباری برادری اور گردو نواح کے لوگوں کو تیز رفتار سفر کی سہولت میسر آگئی ہے۔ فیصل آباد ائر پورٹ پر پرواز کی روانگی کے وقت کیک کاٹا گیا اور مسافروں کو پھول پیش کئے گئے۔ مسافروں کو پی آئی اے کے ڈسٹرکٹ مینیجر شاہد حسین،سٹیشن مینیجر محمد عرفان، سول ایوی ایشن اور اے ایس ایف حکام نے رخصت کیا۔