ون ڈے رینکنگ: سعید اجمل بائولنگ‘ محمد حفیظ آل رائونڈرز میں بازی لے گئے

دبئی(سپورٹس ڈیسک )انٹرنیشنل کرکٹ کونسل نے ون ڈے کی نئی رینکنگ جاری کر دی،بولرز میں سعید اجمل تو آل راونڈرز میں محمد حفیظ پہلی پوزیشن پر ہیں۔ایشیا کپ میں سعید اجمل کی بائولنگ 11 وکٹوں کے ساتھ ملنگا کے ہمراہ پہلی پوزیشن پر رہے ،یہی وجہ ہے کہ انہیں عالمی رینکنگ کی ٹاپ پوزیشن سے کوئی نہ ہلا سکا ،جنوبی افریقا کے ڈیل سٹین دوسرے نمبر پر ہیں،ویسٹ انڈیز کے سپنر نارائن کی تیسری پوزیشن ہے۔آل راونڈرز کی کیٹگری میں بھی پہلا نمبر پاکستان کے محمد حفیظ کے پاس ہے،سری لنکن کپتان اینجلو میتھیوز کی دوسری پوزیشن ہے۔ پاکستان کے شاہد آفریدی کا نمبر 7 واں اور بنگلہ دیش کے شکیب الحسن کا نمبر تیسرا ہے۔ بیٹسمینوں کی رینکنگ میں ٹاپ ٹین میں صرف ایک ہی پاکستانی جگہ برقرار رکھ سکا،کپتان مصباح الحق آٹھویں سے دسویں پوزیشن پر چلے گئے ہیں،بھارت کے کوہلی کا پہلا اور جنوبی افریقا کے ڈی ویلیئرز کا دوسرا نمبر ہے۔