پاکستان سرکٹ ون سکواش ٹورنامنٹ: اسرار احمد نے ٹاپ سیڈ محبوب وقاص کو اپ سیٹ شکست دے دی

لاہور(سپورٹس رپورٹر) ایف ایم سی پاکستان انٹرنیشنل سرکٹ ون سکواش ٹورنامنٹ کے کوالیفائنگ راونڈ کا لاہور میں آغاز ہو گیا جس میں اسرار احمد نے ٹاپ سیڈ محبوب وقاص کو اپ سیٹ شکست سے دوچار کر دیا۔ اسرار احمد نے ٹاپ سیڈ وقاص محبوب کو تین ایک سیٹ سے مات دیدی۔ اسرار احمد نے پہلے دونوں سیٹ 11-7 اور 12-10 سے اپنے نام کیے۔ تیسرے سیٹ میں وقاص محبوب نے 11-6 سے کامیابی حاصل کی تاہم تیسرے سیٹ میں اسرار احمد نے 14-12 سے کامیابی حاصل کر کے مقابلہ اپنے نام کر لیا۔ دیگر مقابلوں میں پاکستان کے صدام الحق نے یو اے ای کے عامر ملک کو، پاکستان کے بلال ذاکر نے اپنے ہم وطن محمد یاسر خان کو، حسیب گل نے چودھری ناصر انور کو، ریئس خان نے 3 سیڈڈ اویس خان کو، ظاہر شاہ نے کاشف آصف کو، سلمان خان نے امریکہ کے عباس جبکہ پاکستان کے عماد فرید نے مہد جاوید کو ہرایا۔ ٹورنامنٹ کا مین راونڈ کل سے شروع ہوگا۔