سائوتھ ایشین باڈی بلڈنگ چیمپئن شپ پاکستان نے جیت لی

لاہور(سپورٹس رپورٹر) 10 ویں ساوتھ ایشین باڈی بلڈنگ چیمپئن شپ 2014ء میزبان پاکستان نے 49 پوائنٹس کے ساتھ جیت لی جبکہ مسٹر ساوتھ ایشیا  شوکت شہزاد اور جونیئر مسٹر ساوتھ ایشیا فہد نسیم بٹ بھی پاکستان کے نام رہا۔ پنجاب حکومت اور سپورٹس بورڈ پنجاب کے زیر اہتمام جاری پنجاب یوتھ فیسٹیول میں پاکستان باڈی بلڈنگ ایسوسی ایشن کے اشتراک سے منعقد ہونے والے 10 ساوتھ ایشین باڈی بلڈنگ چیمپئن شپ میں تین ممالک پاکستان، افغانستان اور نیپال کے 40 تن سازوں نے سینئرز کی 9 اور جونیئرز کی 2 کیٹگریز میں حصہ لیا۔ پاکستان نے مجموعی طور پر 49 پوائنٹس حاصل کر کے ساوتھ ایشین باڈی بلڈنگ چیمپئن شپ کی ٹرافی اپنے نام کی۔ افغانستان 31 پوائنٹس کے ساتھ دوسرے جبکہ نیپال 10 پوائنٹس کے ساتھ تیسرے نمبر پر رہا۔ چیمپئن شپ کی سینئر کیٹگریز کے 55 کلو گرام وزن میں نیپال کے سوجان تامین نے پہلی، پاکستان کے غلام عباس نے دوسری اور پاکستان ہی کے محمد اویس نے تیسری پوزیشن حاصل کی۔ 60 کلو گرام کلاس میں نیپال کے گیان نیرائن ماہرجان نے پہلی، پاکستان کے عابد محمود نے دوسری جبکہ پاکستان ہی کے مجاہد حسین نے تیسری پوزیشن حاصل کی۔ 65 کلو گرام کلاس میں افغانستان کے قربان نے پہلی، پاکستان کے محمد امتیاز نے دوسری،پاکستان ہی کے عبدالرازق نے تیسری پوزیشن حاصل کی۔ 70 کلو گرام میں پاکستان کے اویس سجاد نے پہلی، پاکستان کے امجد یاسین نے دوسری جبکہ افغانستان کے ہنر احمد نے تیسری پوزیشن حاصل کی۔ 75 کلو گرام کلاس میں پہلی تینوں پوزیشن پر پاکستان کا قبضہ رہا۔ بنارس خان پہلے، حافظ عمر دوسرے اور قیصر مرزا تیسرے نمبر پر رہے۔ 80 کلو گرام کلاس میں بھی پاکستان نے تینوں میڈل اپنے نام کیے۔ علی عمران پہلے، زاہد خان دوسرے اور محمد عظیم تیسرے نمبر پر رہے۔ 85 کلو گرام کلاس میں افغانستان کے نصرت انصاری پہلے، پاکستان کے مظہر اقبال دوسرے اور مدثر خالد تیسرے نمبر پر رہے۔ 90 کلو گرام میں افغانستان کے شکر اﷲ پہلے، پاکستان کے محمد راشد دوسرے جبکہ پاکستان ہی کے ذیشان علی تیسرے نمبر پر رہے۔ 90 کلو گرام سے زائد وزن کیٹگری میں پاکستان کے شوکت شہزاد پہلے اور افغانستان کے احمد یاسین دوسرے جبکہ پاکستان کے اعجاز حیدر تیسرے نمبر پر رہے۔ پاکستان نے چار گولڈ، 8 سلور اور 8 برانز میڈیل اپنے نام کیے جبکہ افغنستان نے تین گولڈ اور نیپال نے دو گولڈ میڈل جیتے۔ جونیئرز کی دو کیٹگریز کے 70 کلو گرام مقابلے میں افغانستان کے بریلائی نے جبکہ 70 کلو گرام سے زائد وزن کیٹگری میں پاکستان کے فہد نسیم بٹ نے ٹائٹل اپنے نام کیا۔ چیمپیئن شپ کی اختتامی تقریب کے مہمان خصوصی صوبائی وزیر کھیل رانا مشہود احمد، صوبائی وزیر میاں مجتبٰی شجاع الرحمان اور ڈائریکٹر جنرل سپورٹس بورڈ پنجاب عثمان انور تھے جنہوں نے فاتح تن سازوں میں ٹرافیاں اور سرٹیفکٹس تقسیم کیے۔ اس موقع پر کھیلوں کی مختلف تنظیموں کے عہدیداران سمیت شائقین کی بڑی تعداد موجود تھی۔