اسلام آباد (نمائندہ خصوصی) مسلم لیگ ن کے قائد اور سابق وزیراعظم میاں نوازشریف نے وزیر اعظم کو جلد کابینہ تشکیل دیکر منشور پر عمل درآمد شروع کرنے کی ہدایت کردی۔ ذرائع کے مطابق مسلم لیگ ن کے قائد نوازشریف کی زیر صدارت اہم اجلاس ہوا جس میں وزیر اعظم شہباز شریف سمیت ن لیگ کی سینئر قیادت شریک ہوئی۔ ذرائع کے مطابق قائد مسلم لیگ ن نے کہا کہ صدارتی انتخاب کا مرحلہ آج مکمل ہو جائے گا، وزیراعظم آپ جلد کابینہ تشکیل دیں، ہمیں پہاڑ جیسے چیلنجوں کا سامنا ہے ، عوام کو ہم سے بہت توقعات ہیں ، مہنگائی میں کمی ناگزیر ہے۔ ذرائع کا بتانا ہے کہ اجلاس میں پیپلز پارٹی کو بھی وفاقی کابینہ میں شامل کرنے پر مشاورت کی گئی ، وزیر اعظم شہباز شریف نے کہا کہ آصف زرداری کے صدر منتخب ہونے کے بعد ان سے پھر گزارش کروں گا۔ ذرائع کے مطابق غیر رسمی مشاورت میں اہم قومی و سیاسی امور پر تبادلہ خیال کیاگیا۔
اسلام آباد (نوائے وقت رپورٹ) سابق وزیراعظم اور قائد مسلم لیگ (ن) نواز شریف نے آصف علی زرداری کو صدر پاکستان منتخب ہونے پر مبارک باد دی۔ ذرائع کے مطابق قائد مسلم لیگ نواز شریف نے صدر آصف علی زرداری سے رابطہ کیا اور دوسری مرتبہ صدر بننے پر مبارک باد دی۔ آصف علی زرداری نے نواز شریف کا شکریہ ادا کیا، دونوں رہنماؤں کے درمیان اہم ملاقات آج ہو گی۔ نواز شریف اور آصف علی زرداری نے ملک کو درپیش چیلنجز سے نمٹنے کے لئے مشترکہ کوششوں پر اتفاق کیا۔