لاہور (نامہ نگار) شہر کے مختلف علاقوں میں ڈاکوؤں اور چوروں نے ڈکیتی وچوری کی متعدد وارداتوں میں شہریوں سے لاکھوں روپے مالیت کی نقدی، طلائی زیورات، موبائل فون، موٹرسائیکلیں، گاڑیاں اور دیگر سامان لوٹ لیا ہے۔ تفصیلات کے مطابق ڈاکوؤں نے جوہر ٹاؤن کے علاقے میں محمود کے گھر میں گھس کر اہلخانہ کو گن پوائنٹ پر یرغمال بنا کر 6لاکھ روپے 20 ہزار روپے مالیت کی نقدی، زیورات اور دیگر سامان، اسلام پورہ کے علاقے میں قاسم اور اس کی فیملی سے گن پوائنٹ پر 2تولے طلائی زیورات اور 50ہزار روپے نقدی، ساندہ کے علاقے میں شہباز سے 80ہزار روپے اور موبائل فون، ہنجروال کے علاقے میں کمال سے 35ہزار روپے اور موبائل فون، ڈیفنس بی کے علاقے میں مشتاق سے14ہزار روپے اور موبائل فون، شفیق آباد کے علاقے میں عمر سے 6ہزار روپے اور موبائل فون، گجر پورہ میں کبیر سے گن پوائنٹ پر 20 ہزار روپے اور موبائل فون لوٹ لیا اور فرار ہوگئے ہیں۔ چوروں نے برکی کے علاقے میں عثمان کے گودام سے 3لاکھ روپے مالیت کا کپڑا چوری کر لیا اور فرار ہو گئے ہیں۔ چوروں نے ڈیفنس، گبرگ، شاہدرہ اور ساندہ کے علاقوں میں سے 4 گاڑیاں جبکہ فیکٹری ایریا، ساندہ، سرور روڈ، قائد اعظم انڈسٹریل اسٹیٹ، کاہنہ، شادمان اور سوال لائن کے علاقوں میں سے8 موٹر سائیکلیں چوری کر لیں۔