گورنمنٹ ہائیر سیکنڈری سکول بیول میں سپورٹس ایوارڈ کی تقریب  

  بیول(نامہ نگار)گورنمنٹ ہائیر سیکنڈری سکول بیول میں سپورٹس ایوارڈ کی تقریب کا انعقاد کیا گیا۔ہائیر سیکنڈری سکول بیول کی کبڈی اور رسہ کشی کی ٹیموں نے تحصیل سطح پر اول پوزیشن حاصل کی ہے جبکہ انٹر ڈسٹرکٹ بورڈ کی سطح پر رنر اپ رہی ہیں۔اسی طرح بیول سکول کی کبڈی ٹیم نے سپورٹس کمپلیکس اسلام آباد میں منعقد ہونے والے انٹرا بورڈ مقابلوں میں راولپنڈی بورڈ کی نمائندگی کی ہے۔ان کھیلوں میں حصہ لینے والے تمام طلبہ کی حوصلہ افزائی کے لئے ایک تقریب کا انعقاد کیا گیا جس میں کھلاڑیوں کو شیلڈز، ٹرافیاں اور سرٹیفکیٹ اور نقد انعامات دئیے گئے۔ہیڈ ماسٹر ایسوسی ایشن کی جانب سے اور پنجاب ٹیچر یونین کی جانب سے ونر اور رنر اپ کی شیلڈز دی گئی۔جبکہ سیاسی و سماجی شخصیت چوہدری وسیم کی جانب سے ٹرافیاں اور نقد انعام دیے گئے۔اس تقریب میں چوہدری ابرار، عبدالجبار بھٹی،مرزا عابد محمود صدر پی ٹی یو حلقہ قاضیاں، چوہدری عبدالخطیب، چوہدری  طارق پرویز ، بشیر وارثی،شوکت شاہ ،حنیف ملنگی، عاطف عاطی،سکول کمیٹی کے ممبران اور سابقہ کھلاڑیوں نے شرکت کی۔پرنسپل محمد افتخار نے چوہدری وسیم کا شکریہ ادا کیا جنہوں نے کھلاڑیوں کی حوصلہ افزائی کی۔