تخریب کاری میں ملوث مزید 5 بھارتی سفارتکار پاکستان بدرکردئیے گئے

لاہور(آئی این پی) پاکستان میں سفارت کاری کی آڑ میں کام کرنے والے بھارتی خفیہ ایجنسیوں ”را“ اور ”آئی بی“ کے مزید 5 ایجنٹوں کو بے دخل کردیا گیا۔ تخریب کاری میں ملوث مزید 5بھارتی سفارت کاروں کو بدھ کو واہگہ کے راستے ملک سے بے دخل کردیا گیا۔ واہگہ کے راستے بھارت واپس جانے والے بھارتی سفارتی عملے میں راجیش کماراگنی ہوتری، امردیپ سنگھ، ٹوڈواٹا چی سمیت 5 افراد شامل ہیں۔ گزشتہ روز بھی 3 بھارتی سفارت کاروں کو اسلام آباد سے براستہ دبئی بھارت واپس روانہ کیا گیا تھا۔ پاکستان نے سفارتی آداب کی خلاف ورزی اور ملک کی سالمیت کے خلاف کام کرنے والے آٹھوں سفارت کاروں کو ناپسندیدہ قرار دیا تھا۔