لاہور(کلچرل رپورٹر)اقبال کا زندہ جاوید پیغام ذہنوں اور دلوں کو تسخیر کرنے کی بے پناہ طاقت رکھتا ہے، علوم جدید و قدیم پر ان کی گہری نظر تھی۔ان خیالات کا اظہار چیئرمین بورڈ آف گورنرز، لاہور آرٹس کونسل (الحمرا) توقیر ناصر نے شاعر مشرق، مفکر و فلاسفر ڈاکٹر علامہ محمد اقبال کے 141 ویں یوم ولادت کے موقع پر اپنے پیغام میں کیا۔ انہوں نے کہا کہ وہ ان کا نام اور کام ہماری ثقافت کا بنیادی حوالہ ہیں جس کو آگے نئی نسل تک منتقل کرنے کیلئے لاہور آرٹس کونسل کے پلیٹ فارم پر کاوشیں کی جارہی ہیں۔ ایگزیکٹو ڈائریکٹر لاہور آرٹس کونسل مظفر خان سیال نے کہاکہ اقبال کی فکر سے آج کا نوجوان نیا یقین، نئی روشنی اور ایک نئی قوت و توانائی حاصل کر سکتا ہے ۔ وہ عالم میں ہماری شناخت ہیں، ان کی زندگی ایک واضح دستور پر مبنی ہے جو ظلمتوں میں روشنی کے مینار کی مانند ہے۔