لاہور(سپورٹس رپورٹر)بنگلہ دیش میں پاکستان کے سفیر سید احمد معروف کی جانب سے پاکستان اور بنگلہ دیش کی خواتین کرکٹ ٹیموں کے اعزاز میں ڈنر کا اہتمام کیا گیا ۔قومی ویمنز ٹیم نے پاکستان کے سفیر کو اپنے دستخط والی جرسی بھی پیش کی ۔ پاکستان اور بنگلہ دیش کی خواتین ٹیموں کے درمیان ون ڈے سیریز کا فیصلہ کن میچ آج کھیلا جائے گا۔ ڈھاکہ کے شیرا بنگلہ نیشنل سٹیڈیم میں آج کے کھیل کی فاتح نہ صرف ون ڈے سیریز جیت لے گی بلکہ آئی سی سی ویمنز چیمپئن شپ 2022-25 کے دو اہم پوائنٹس بھی حاصل کرے گی۔پاکستان ویمن ٹیم نے چیمپئن شپ میں 14 میچوں میں 14 پوائنٹس حاصل کیے ہیں جبکہ میزبان ٹیم نے 11 میچوں میں 9 پوائنٹس حاصل کیے ہیں۔