بھارت سے چلنے والی آلودہ ہواؤں کی وجہ سے لاہور پھر فضائی آلودگی میں پہلے نمبر پر آگیا

بھارت سے چلنے والی آلودہ ہواؤں نے پنجاب اور خیبر پختونخوا کے بیشتر اضلاع کو اپنی لپیٹ میں لے لیا۔ فضائی آلودگی کی وجہ سے ملک کے آلودہ ترین شہروں میں لاہور کا پہلا، ملتان کا دوسرا اور پشاور کا تیسرا نمبر ہے، لاہور میں پارٹیکولیٹ میٹرز کی تعداد 753، ملتان میں 587 اور پشاور میں 463 ریکارڈ کی گئی۔ماہرین کا کہنا ہے کہ فضا کا یہ معیار انسانی صحت کے لیے انتہائی نقصان دہ ہے، پنجاب اور کے پی میں شہریوں کو سانس لینے میں مسائل کا سامنا ہے جبکہ ناک، کان اور گلے کی بیماریوں میں اضافہ ہوگیا ہے۔پنجاب کی سینئر وزیر مریم اورنگزیب نے کہا ہے کہ یہ مسئلہ اب ایک شہر یا صوبے کا نہیں، پورے پاکستان اور خطے کا انسانی مسئلہ بن چکا ہے، شہری احتیاط کریں، شدید آلودگی کا شکار شہروں کے مکین بلا ضرورت گھروں سے نہ نکلیں۔