راولپنڈی (آن لائن) وزیر مملکت برائے پانی و بجلی چوہدری عابد شیر علی نے کہا ہے کہ شیخ رشید کو مسلم لیگ (ن) سے نہیں بلکہ اپنے بھائیوں اور بھتیجوں سے خطرہ ہے جنہوں نے شیخ رشید کی بہاولپور جیل کی اسیری کے دوران ان کی جگہ سنبھالنے کیلئے واسکٹیں پہن لی تھیں، رشید بٹ سے شیخ رشید کیسے بنے ہمارا منہ نہ کھلوایا جائے تو بہتر ہے۔رشید بٹ پر گلوں بٹوں نے گندے انڈے پھینکے ہیں تو یہ ان کی برادری کا مسئلہ ہے وہ اس مسئلے میں حکومت کو خوامخواہ نہ الجھائیں۔  شیخ رشید کی پریس کانفرنس پر اپنے ردعمل میں وزیر مملکت برائے پانی و بجلی  چودھری عابد شیر علی نے کہا  کہ میں ذاتی طور پر شیخ رشید کا بہت احترام کرتا ہوں لیکن جب وہ گندی مچھلی بیچتے ہیں تو دل دکھتا ہے، نواز شریف اور شہباز شریف پر حملوں کا الزام لگاتے ہوئے انہیں شرم آنی چاہیئے، سانحہ خیابان میں انواری گن مین سمیت دیگر کارکنوں کو الیکشن جیتنے کیلئے کس نے مروایا ساری دنیا جانتی ہے،  ایک طرف شیخ رشید جس پریس کانفرنس میںکہتے ہیں کہ وہ مریم بیٹی اور حمزہ سمیت دیگر بچوں پر تنقید نہیں کرتے اسی پریس کانفرنس میں حسین نواز پر تنقید کرکے آخر وہ کیا ثابت کرنا چاہتے ہیں۔