جنوبی افریقہ نے عالمی چیمپئن آسٹریلیا کی پھر درگت بناڈالی ‘چوتھا میچ بھی جیت لیا

پورٹ ایلزبتھ (سپورٹس ڈیسک)جنوبی افریقہ نے عالمی چیمپئن آسٹریلیا کو پانچ ون ڈے میچوں کی سیریز کے چوتھے میچ میں 6وکٹوں سے ہرا کر برتری چار صفر کرلی ۔کینگروز ابتدائی وکٹیں جلد گرنے کی وجہ سے دبائو کا شکار ہوگئے اور دوبارہ سنبھل نہ سکے اور پوری ٹیم پہلے کھیلتے ہوئے36.4اوورز میں168رنز پر ڈھیر ہوگئی ۔سات کھلاڑی ڈبل فگر میں بھی داخل نہ ہوسکے ۔مچل مارش نے 50اور میتھیو ویڈ نے 52رنز بنائے ۔اینڈریو فنچ دو‘ڈیوڈ وارنر چھ ‘کتپان سمتھ اکیس ‘جارج بیلی ایک ‘ہیڈ صفر‘ہیسٹنگز چار‘ایڈم زمپا پانچ ‘بولینڈ صفر رن پر آئوٹ ہوئے ۔ٹریمین 23رنز اپر ناٹ آئوٹ رہے ۔کائل ایبٹ نے چار‘شمس تبریزی نے تین جبکہ فنگیسو نے دو کھلاڑیوں کو آئوٹ کیا۔جنوبی افریقہ نے ہدف چار وکٹوں پر 35.3اوورز میں پور ا کرلیا ۔ہاشم آملہ چار‘کوئنٹن ڈی کاک اٹھارہ ‘کپتان ڈوپلیسی 69اور ڈومینی پچیس رنز بناکرآئوٹ ہوئے ۔ روسو تینتیس جبکہ فرحان بہار دین بارہ رنز پر ناقابل شکست رہے ۔ٹریمین نے دو کھلاڑیوں کو آئوٹ کیا۔کائل ایبٹ کو میچ کا بہترین کھلاڑی قرار دیا گیا ۔