ملتان : معروف اسٹیج اداکارہ شمیم عرف شمو فائرنگ سے قتل

ملتان(صباح نیوز)سٹیج اداکارہ شمیم عرف شمو کو فائرنگ کرکے قتل کردیا گیا ہے۔سٹیج ڈراموں کی معروف اداکارہ شمیم عرف شمو فائرنگ سے جاں بحق ہوگئی۔ پولیس کے مطابق ادکارہ ملتان کے علاقے شاہ ٹاون میں کرائے کے مکان پر رہائش پذیر تھیں ان کے شوہر نے رات گئے اطلاع دی کہ ان کی اہلیہ کو قتل کردیا گیا ہے۔پولیس حکام کا کہنا ہے کہ ابتدائی تفتیش میں انکشاف ہوا ہے کہ اداکارہ کو گھر میں ہی قتل کیا گیا ہے اور ان کے شوہر نے اہلیہ کے قتل کی خبر واقعے کے 4 گھنٹے بعد دی جس پر پولیس نے کارروائی کرتے ہوئے اداکارہ کے شوہر کو شک کی بنیاد پرحراست میں لے لیا ہے اور مزید قتل کے حوالے سے تفتیش کی جارہی ہے۔