پاکستان فٹ بال فیڈریشن نے تربیتی کیمپ کیلئے 30خواتین فٹبالرز کو طلب کرلیا 

لاہور(نمائندہ سپورٹس+سپورٹس رپورٹر) پاکستان فٹبال فیڈریشن نے  قومی ویمن فٹبال ٹیم کی از سر نو تشکیل کیلئے 30 کھلاڑیوں کو کیمپ میں لاہور طلب کرلیا۔  قومی ویمن فٹبالرز کیلئے 26 اکتوبر سے یکم نومبر تک لاہور میں کیمپ لگانے کا فیصلہ کیا ہے۔کیمپ کی نگرانی پی ایف ایف کے ڈائریکٹر ٹیکنیکل ڈینیئل لمونیس کریں گے۔ کیمپ کے بعد خواتین فٹبال لیگ کا بھی انعقاد ہوگا اور ان دونوں ایونٹس سے قومی ویمن ٹیم کی تشکیل نو کی جائیگی۔ تاکہ مستقبل کے ایونٹس پلان ہو سکیں۔جن 30 کھلاڑیوں کو کیمپ میں طلب کیا گیا ہے ان میں ہاجرہ خان‘ ذوالفیا نذیر ، کرن قریشی، سحر زمان، مشعل، عالیہ علاؤالدین، داہلیہ فاروق، فاطمہ بلوچ، نینا زہری، علیزہ، ایشل، خدیجہ کاظمی، نِشا، رامین، روبینہ، بی بی عزیز، غزالہ عامر، کافیہ کریم، سارہ خان، شاہدہ امین، عالیہ صادق، عاصمہ عثمان، دعا گیلانی، ماریہ جمیلہ، مہناز شاہ، رافعہ پروین، شمائلہ ستار، فاطمہ انصاری اور ابیحہ حیدر شامل ہیں۔