تین، چار سال تک پاکستانی ہاکی ٹیم کی نمائندگی کر سکتا ہوں : اختر علی

لاہور (سپورٹس رپورٹر) پاکستان ہاکی ٹیم کے فاروڈ کھلاڑی اختر علی نے کہا کہ ابھی تین سے چار سال تک پاکستان ہاکی ٹیم کی نمائندگی کر سکتا ہوں۔ موقع دیا گیا تو انشااﷲ فیڈریشن اور قوم کی توقعات پر پورا اُتر سکتا ہوں۔ انہوں نے کہا کہ ٹیم کو ابھی سینئر کھلاڑیوں کی ضرورت ہے کیونکہ جونیئر کھلاڑی ابھی بہت زیادہ چھوٹے ہیں۔ پاکستان ہاکی فیڈریشن نے قومی کھیل کی ترقی کے لئے جو اقدامات کئے ہیں، انتہائی شاندار رہے ہیں کھلاڑیوں کو مکمل سہولیات فراہم کی ہیں۔ انہوں نے کہا یورپ میں لیگ ہاکی کھیل رہا ہوں اپنی فارم اور فٹنس پر بہت زیادہ توجہ دیتا ہوں تاکہ میرا انٹرنیشنل کیرئیر لمبا ہو سکے۔ اس سے قبل بنگلہ دیش، ملائیشیا اور ہالینڈ کی لیگ ہاکی میں بھی نمائندگی کر چکا ہوں جس کا معیار بین الاقوامی ہاکی سے کم نہیں ہوتا۔ پاکستان کے لئے کھیلنا ہمیشہ ہی سے اعزاز رہا ہے۔ میری کوشش ہے کہ اب بھی پاکستان کی جانب سے کھیلنے کا موقعہ ملے تاکہ ملک کا نام روشن کر سکوں۔