راولپنڈی، اسلام آباد کی6,6ٹیمیں بنائےں،اصل ٹاکرا17ستمبرکو ہوگا ،شعیب نوید

اسلام آباد(سپورٹس رپورٹر)اسلام آباد یونائیٹڈ کے چیف آپریٹنگ آفیسر شعیب نویدنے کہا ہے کہ اسلام آباد یونائیٹڈ نے راولپنڈی اور اسلام آباد میں ٹرائلز کرکے6,6ٹیمیں بنائی ہیں ،جن کے 6ستمبر سے میچز کا آغاز ہوچکا ہے ،اس میں انڈر۔23اور انڈر۔16کے لڑکے شامل ہیں،ان ٹیموں کا اصل ٹاکرا17ستمبر سے شروع ہوگا جس کے بعد راولپنڈی اور اسلام آباد کی ٹاپ کی دو ٹیموں کے درمیان فائنل کھیلا جائیگا جبکہ بہترین کھلاڑیوں پر مشتمل دو ٹیموں کے درمیان الگ سے فائنل میچ کھیلا جائیگا۔شالیمار کرکٹ گراونڈ میںپاکستان کرکٹ بورڈ کی گورننگ باڈی کے رکن شکیل شیخ اور راولپنڈی کرکٹ ایسوسی ایشن کے صدر میجر(ر) نعیم گیلانی کے ہمراہ پریس کانفرنس سے خطاب کرتے ہوئے شعیب نوید نے کہا کہ قومی کرکٹر شاداب خان اور رومان رئیس بھی ٹاکرا کے میچز میں شرکت کرینگے۔۔پاکستان کرکٹ بورڈ کی گورننگ باڈی کے رکن شکیل شیخ نے کہا کہ اسلام آباد یونائیٹڈ نے یہ بہت اچھا اقدام کیا ہے ،جڑواں شہروں میں کرکٹ کا بہت ٹیلنٹ موجود ہے،ان کے اس اقدام سے اسلام آباد کیساتھ ساتھ پاکستان کو بہت فائدہ حاصل ہوگااور نیا ٹیلنٹ سامنے آئیگا۔ راولپنڈی کرکٹ ایسوسی ایشن کے صدر میجر(ر) نعیم گیلانی نے کہا کہ،نوجوان لڑکوں کی وجہ سے اچھے مقابلے دیکھنے کو ملیں گے۔