وانا: بم دھماکہ، پولیس اہلکاروں سمیت 12 زخمی، پشاور میں دہشتگردی کا منصوبہ ناکام 

وانا+ پشاور (آئی این پی+ این این آئی ) جنوبی وزیرستان کے وانا رستم بازار میں کریکوٹ روڈ پر پولیس وین پر ریموٹ کنٹرول بم دھماکا ہوا ہے۔ جس کے نتیجے میں بارہ افراد زخمی ہوگئے۔ کئی زخمیوں کی حالت تشویشناک ہے اور علاقے کو گھیرے میں لے کر تفتیش شروع کر دی گئی ہے۔ اس حوالے سے ایم ایس ڈاکٹر حماد محمود نے بتایا کہ دھماکے میں زخمی ہونے والے 12 افراد کو ہسپتال لایا گیا۔ زخمیوں میں عام شہری اور پولیس اہلکار شامل ہیں۔ دریں اثناء پشاور میں تباہی پھیلانے کا منصوبہ ناکام بنا دیا گیا۔ رنگ روڈ کے قریب موٹر سائیکل سوار سے خودکش جیکٹ برآمد کر لی گئی۔ ایکسائز پولیس کے مطابق رنگ روڈ کے قریب ایک موٹر سائیکل کو رکنے کا اشارہ کیا جس پر موٹر سائیکل سوار خودکش جیکٹ پھینک کر فرار ہو گئے۔ پولیس کے مطابق بم ڈسپوزل یونٹ کی مدد سے جیکٹ کو ناکارہ بنا دیا گیا۔ جیکٹ میں 6 سے 7 کلو گرام بارودی مواد تھا۔