اسلام آباد  (خبرنگارخصوصی ) پاکستان نے بین الاقوامی سطح پر ایک اور تاریخی اعزاز حاصل کر لیا۔ذرائع کے مطابق برطانیہ میں ہونے والی شوٹنگ چیمپئن شپ 2024 میں پاکستان کو بڑی جیت ہوئی۔ لانگ رینج شوٹنگ چیمپئن شپ ( 3 سے 8 ستمبر) برطانیہ کے لیجنڈری بسلی رینجز میں منقعد کی گئی۔ شوٹنگ چیمپئن شپ میں 18 ممالک کے تقریبا 160 عالمی معیار کے نشانہ بازوں نے حصہ لیا چیمپئن شپ کے دوران پاکستان کی جانب سے 18 نشانے بازوں کے دستے نے پاکستان کی نمائندگی کی اور مختلف چیلنجز اور پیشہ وارانہ صلاحیتوں سے لیس پاکستانی ٹیم نے شاندار کارکردگی سے قوم کا سر فخر سے بلند کیا۔ پاکستانی ٹیم نے 3 گولڈ، 4 سلور اور 4 کانسی کے تمغوں کی شاندار کامیابی حاصل کی۔ گولڈ میڈل جیتنے والوں میں جنید خٹک اور احمد جاوید شامل تھے جبکہ ایف ٹی آر کیٹیگری میں پاکستانی ٹیم نے انفرادی تمغوں کے متعدد انعام جیتے، پاکستان نے چیمپئن شپ کے مجموعی ٹاپ 10 میں 3 پوزیشنز حاصل کرتے ہوئے ٹاپ انفرادی شوٹرز میں بھی نمایاں کارکردگی دکھائی۔ پاکستانی شوٹرز نے سبز ہلالی پرچم کو نئی بلندیوں تک پہنچا کر ملک کا نام فخر سے بلند کیا۔