باﺅلنگ کوچ محمد اکرم ‘ عاقب جاوید سے سوئنگ کرانے کا طریقہ سیکھا: جنید خان

لاہور (آئی این پی) پاکستان کرکٹ ٹیم کے فاسٹ باﺅلر جنید خان نے کہاکہ وہ سابق کپتان وسیم اکرم سے استفادہ کرتے ہوئے سوئنگ پر مکمل عبورحاصل کرنا چاہتے ہیں۔ اپنے ایک انٹرویو میں جنید خان نے کہاکہ پاکستان کرکٹ بورڈ نے چیمپئنز ٹرافی کےلئے لگائے جانیوالے تربیتی کیمپ کےلئے سابق کپتان کی خدمات حاصل کر کے بہت اچھا فیصلہ کیاہے، وسیم اکرم کی کیمپ میں موجودگی سے فاسٹ باﺅلرز کو اپنی خامیاں دور کرنے میں مدد ملے گی۔ جنید خان نے کہاکہ ا س سے پہلے بھی میں وسیم اکرم سے گاہے بگاہے ٹپس لیتارہتاتھا مگر اب کیمپ میں ان کی موجودگی سے اور بھی فائدہ ملے گا۔ انہوں نے کہاکہ یہ پہلا موقع ہے کہ ہمیں 20دن تک وسیم اکرم سے تربیت حاصل کرنے کا موقع مل رہاہے اور ہمیں یقین ہے کہ اس سے فاسٹ باﺅلرز بہت کچھ سیکھیں گے۔ جنید خان نے کہاکہ باﺅلنگ کوچ محمد اکرم اور عاقب جاوید سے بھی میں نے سوئنگ کرانے کا طریقہ سیکھا لیکن اس حوالے سے وسیم اکرم سے بھی ٹپس لوں گا۔