لاہور (سپورٹس رپورٹر ) پاکستانی بیس بال ٹیم رواں سال ستمبر میں چین میں ہونے وا لی 19ویں ایشین گیمز میں شرکت کرے گی، ان گیمز میں جنوبی  ایشیا سے شرکت کرنیوالی پاکستان کی واحد ٹیم ہو گی ۔ پاکستان فیڈریشن آف بیس بال (پی ایف بی) کے صدر سید فخر علی شاہ نے کہا    کہ پی ایف بی نے پاکستان سپورٹس بورڈ کے ڈائریکٹر جنرل کرنل (ر) آصف زمان  وک  ایک خط لکھا ہے جس میں ان پر زور دیا گیا ہے کہ وہ پاکستان بیس بال ٹیم کا کیمپ پاکستان سپورٹس کمپلیکس اسلام آباد میں لگائیں۔ پی ایف بی نے ڈی جی پی ایس بی کو ایک یاد دہانی خط بھیجا ہے کہ سپورٹس بورڈ نے دیگر کھیلوں کے تربیتی کیمپ شروع کر دیئے ہیں اس لیے پاکستان بیس بال ٹیم کا کیمپ جلد از جلد منعقد کیا جائے۔کیمپ لگانے میں طویل تاخیر سے نہ صرف بیس بال کے کھیل بلکہ ایشین گیمز کے نتائج بھی متاثر ہوں گے۔ بیس بال فیڈریشن آف ایشیا کے مطابق ان گیمز میں ایشیا کی ٹاپ 6 ٹیمیں حصہ لے رہی ہیں صرف پاکستان کی بیس بال ٹیم کا تعلق جنوبی ایشیا سے ہے۔