لندن (عارف چودھری) لندن میں شریف خاندان کے فلیٹس کے باہر بڑی تعداد میں پی ٹی آئی کارکنوں اوورسیز پاکستانیوں نے احتجاج کیا۔ شدید نعرہ بازی بھی کی۔ عمران حکومت کے خاتمے پر اوورسیز پاکستانیوں میں غم و غصہ پایا جاتا ہے۔ شرکاء نے بچوں کوگود اٹھا رکھا تھا۔ سابق وزیراعظم عمران خان کے خلاف تحریک عدم اعتماد کامیاب ہونے کے بعد مسلم لیگ ن کے کارکنوں نے لندن میں موجود اپنے قائد میاں محمد نواز شریف کی رہائش گاہ کے باہر جشن منایا۔ ڈھول کی تھاپ پر بھنگڑے بھی ڈالے۔ مسلم لیگ ن کی نائب صدر مریم نواز نے ٹوئٹر اکائونٹ سے کارکنوں کے جشن منانے کی ویڈیو شیئر کی ہے۔عمران خان کو وزات عظمیٰ سے ہٹائے جانے کے خلاف لندن کے پارک لین روڈ پر احتجاج کیا گیا۔ یہ وہی پارک لین روڈ ہے جہاں ایون فیلڈ اپارٹمنٹ یعنی سابق وزیراعظم نواز شریف کا گھر بھی واقع ہے۔ پی ٹی آئی نے لندن میں امریکی سفارت خانے کے باہر احتجاج کرنے کا فیصلہ کیا تھا لیکن پھر وہ احتجاج کرنے ایون فیلڈ فلیٹس آگئے۔