لاہور(نیوز رپورٹر)ماہ رمضان کے دوران پی ٹی وی لاہور سنٹر کی جانب سے رمضان ٹرانسمیشن کا سلسلہ جاری ہے۔اس سال سحرو افطار ٹرانسمیشن لاہور سنٹر سے جاری ہے جسے عوام کی بڑی تعداد کی جانب سے بھرپور پذیرائی مل رہی ہے۔رمضان سحرو افطار ٹرانسمیشن کے ہیڈ آف پراجیکٹ جی ایم پی ٹی وی لاہور سنٹر سیف الدین ہیں۔ سحری کی ٹرانسمیشن کو سندس جمیل اور یاسر قریشی ہوسٹ کررہے ہیں جبکہ محسن جعفر پرڈیوسر کے فرائض انجام دے رہے ہیں۔ اسی طرح افطار ٹرانسمیشن کو جگن کاظم اور سمیع خاں ہوسٹ کررہے ہیں افطار ٹرانسمیشن کے پرڈیوسر کے فرائض قیصر شریف ادا کررہے ہیں۔پی ٹی وی لاہور سنٹر کی جانب سے جاری رمضان ٹرانسمیشن میں مختلف سیگمٹ شامل کئے گئے ہیں جن میں تلاوت کلام پاک اور نعت شریف کے ساتھ فضائل رمضان اور دین اسلام کی روشنی میں روزمرہ کے معاملات پر علما کرام مسائل بیان کرتے ہیں۔معروف نعت خواں احمد رضا قادری اپنی خوبصورت آواز میں نبی آخر الزماں حضرت محمدﷺکی شان میں گل ہائے عقیدت پیش کرتے ہیں۔ ننھی معصوم بچی نادیہ ہاشمی خوبصورت انداز میں تلاوت قرآن مجید اور نعت خوانی کی سعادت بھی حاصل کرتی ہیں۔