لاہور نے وومنز ڈبلز بیڈمنٹن ، مینز ڈبلز بیڈمنٹن چیمپیئن شپ گوجرانوالہ نے جیت لیں

لاہور (سپورٹس رپورٹر)نگران وزیراعلی پنجاب سید محسن نقوی کی ہدایت پر مشیر کھیل پنجاب وہاب ریاض کی زیرنگرانی ’’پہلی رمضان المبارک سپورٹس سیریز 2023ء ‘‘ کے مقابلے تیسرے روز بھی جاری رہے، بہاولپور ڈویژن نے ٹیبل ٹینس وومنز ڈبلز چیمپئن شپ اور فیصل آباد ڈویژن نے ٹیبل ٹینس مینز ڈبلز چیمپئن شپ جیت لیں۔ لاہور ڈویژن نے وومنز ڈبلز بیڈمنٹن چیمپیئن شپ اور مینز ڈبلز بیڈمنٹن چیمپیئن شپ گوجرانوالہ ڈویڑن نے جیت لیں، کرکٹ ٹیپ بال ٹورنامنٹ رائیونڈ گرین لاہور سٹی بلیو کو شکست دیکر جیت لیا، ٹیبل ٹینس وومن ڈبلز چیمپئن شپ کے فائنل میں بہاولپور کی محمودہ اور سعدیہ نے راولپنڈی کی عائشہ اور زنیرہ کو3-1سے شکست دیدی،ٹیبل ٹینس مینز ڈبلز کے فائنل میں فیصل آباد کے رحیم اور حمزہ نے لاہور کے عاصم قریشی اور اویس کو 3-1سے شکست دی۔ گوجرنوالہ ڈویژن نے فائنل میں فیصل آباد کو 21-14اور 21-15سے ہرایا،فائنل میں گوجرانوالہ کے امریز اورعظیم سرور فاتح رہے۔وومنز ڈبلز بیڈمنٹن چیمپیئن شپ لاہور ڈویژن نے جیت لی، فائنل میں لاہور کی غزالہ اور صائمہ نے فیصل آباد کی ٹیم کو 21-14اور 21-12شکست دی، کرکٹ ٹیپ بال ٹورنامنٹ رائیونڈ گرین نے شاندار کھیل کا مظاہرہ کرتے ہوئے ٹورنامنٹ جیتا، فائنل میں رائیونڈ گرین نے لاہور سٹی بلیو کو 8وکٹوں سے شکست دی،لاہور سٹی بلیو نے پہلے بیٹنگ کرتے ہوئے 2وکٹوں کے نقصان پر 76رنز بنائے،رائیونڈ گرین نے مطلوبہ ہدف 2وکٹوں کے نقصان پر حاصل کرلیا، رائیونڈ گرین کے ٹاپ سکورر نعمان رہے، انہوں نے 42 رنز اور لاہور سٹی بلیو کے غفار نے 44 رنز بنائے، کرکٹ ٹیپ بال ٹورنامنٹ ایل سی سی اے گراؤنڈ میں کھیلا گیا، لاہور ڈویڑن اور فیصل آباد ڈویڑن ہاکی چیمپئن شپ کے فائنل میں پہنچ گئے، پہلے سیمی فائنل میں لاہور ڈویڑن کی ٹیم نے راولپنڈی ڈویڑن کی ٹیم کو 3-0سے ہرادیا، لاہور کے علی عزیز نے 2اور عبدالمنان نے ایک گول کیا،دوسرے سیمی فائنل میں فیصل آباد نے ساہیوال کو 2-0سے ہرادیا،فیصل آباد کی جانب سے سہیل انجم اور توثیق ارشد نے ایک، ایک گول کیا،فٹ بال کے پہلے میچ میں فیصل آباد نے ملتان کو 3-0،دوسرے میچ میں سرگودھا نے بہاولپور کو 2-1اور تیسرے میچ میں لاہور نے ساہیوال کو ایک صفر سے ہرادیا۔ قبل ازیں پہلے ٹیبل ٹینس کے مینز سنگلز کے پہلے سیمی فائنل میں لاہور کے عاصم اور اویس نے راولپنڈی کے ارشد اور عابد کو 3-0سے ہرایا،دوسرے سیمی فائنل میں فیصل آباد کے رحیم اور حمزہ نے فیصل آباد ہی کے فیضان اور حفیظ کو 3-0سے شکست دی، لاہور کے عاصم قریشی اور فیصل آباد کے حفیظ الرحمن ٹیبل ٹینس چیمپئن شپ کے مینز سنگلز کے فائنل میں پہنچ گئے، پہلے سیمی فائنل میں لاہور کے عاصم قریشی نے فیصل آباد کے فیضان ظہور کو 3-1سے شکست دیدی،دوسرے سیمی فائنل میں فیصل آباد کے حفیظ الرحمن نے لاہور کے اویس حسن کو 3-2سے ہرایا۔