پی آئی اے نے پریمیئر پروازوں کے نظام الاوقات میں تبدیلیاں کر دیں

لاہور(خبر نگار)پی آئی اے 14 اگست سے اسلام آباد اور لاہور سے لندن کیلئے اپنی نئی پریمیئر سروس پروازوں کا آغاز کر رہی ہے۔پی آئی اے کے ترجمان کے مطابق آپریشنل وجوہات کی بنا پر پہلے چند ہفتوں کیلئے پریمئر پروازوں کے نظام الاوقات میں تبدیلیاں کی گئی ہیں۔ پی آئی اے کی پیر اور بدھ کو لندن سے اسلام آباد آنے والی پروازPK786 کو پی آئی اے پریمئر پروازوں میں تبدیل کر کے PK758 لندن سے لاہور کیلئے آپریٹ کیا جائے گا جبکہ منگل کے روز لندن سے لاہور آنے والی پرواز کو پریمئر پرواز میں تبدیل کر کے لندن سے اسلام آباد کیلئے آپریٹ کیا جائے گا۔ مسافر بغیر کسی اضافی چارجز کے مستفید ہوں گے ۔ مسافروں کے سامان کی ڈیلوری اور ان کی امیگریشن پہلے سے بک کی گئی ٹکٹ کے مطابق ان کی منزل مقصود پر ہی ہو گی۔ پی آئی اے نے ان عارضی تبدیلوں سے مسافروں کو ہونے والی زحمت پر معذرت کی ہے ۔