مونٹریال (اے پی پی) سیمونا ہالیپ، ایلیز مرٹنز اور ایلینا سویٹولینا نے راجرز کپ ٹینس ٹورنامنٹ ویمنز سنگلز کوارٹر فائنل رائونڈ میں جگہ بنا لی۔ کینیڈا میں جاری ایونٹ میں کھیلے گئے ویمنز سنگلز پری کوارٹر فائنل رائونڈ میچز میں رومانیہ کی مایہ ناز ٹینس سٹار اور عالمی نمبر ایک سیمونا ہالیپ نے امریکا کی نامور ٹینس سٹار اور سابق عالمی نمبر ایک وینس ولیمز کو سٹریٹ سیٹس میں 6-2 اور 6-2 سے ہرا کر ایونٹ کے کوارٹر فائنل رائونڈ میں جگہ بنائی۔ جرمن کھلاڑی ایلیز مرٹنز نے بیلاروس کی آرینا سابالینکا کو زیر کر پری کوارٹر فائنل مرحلہ عبور کیا۔، انکی جیت کا سکور 2-6، 7-6(7-1) اور 6-0 تھا۔ ایک اور میچ میں یوکرائن کی ایلینا سویٹولینا نے عمدہ کھیل پیش کرتے ہوئے جوہانا کونٹا کو سٹریٹ سیٹس میں 6-3 اور 6-4 سے مات دیکر ایونٹ کے کوارٹر فائنل کے لئے کوالیفائی کرلیا۔