مظفر آباد (این این آئی)کشمیر پریمئر لیگ میں راولاکوٹ ہاکس نے مظفر آباد ٹائیگرز کو اعصاب شکن مقابلے کے بعد ایک رن سے شکست دیدی، مظفر آباد کی ٹیم 176 رنز کے تعاقب میں 8 وکٹوں کے نقصان پر 174 رنز بنا سکی، زمان خان نے تین کھلاڑیوں کو آئوٹ کیا، حسین طلعت کو 69 رنز کی اننگز کھیلنے پر مین آف دی میچ قرار دیا گیا۔ تفصیلات کے مطابق مظفر آباد سٹیڈیم میں کھیلے گئے لیگ کے 7 ویں میچ میں راولاکوٹ ہاکس نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 175 رنز بنائے۔ حسین طلعت نے عمدہ بیٹنگ کا مظاہرہ کیا اور 69 رنز بنائے۔ دیگر بلے بازوں میں احمد شہزاد 50 اور محمد عمران 40 رنز کے ساتھ نمایاں رہے۔ محمد وسیم نے تین اور ارشد اقبال نے دو وکٹیں حاصل کیں۔ مظفر آباد ٹائیگرز کی ٹیم مطلوبہ ہدف حاصل کرنے میں ناکام رہی اور اس نے مقررہ 20 اوورز میں 8 وکٹوں کے نقصان پر 174 رنز بنائے۔ کپتان محمد حفیظ 44 اور ذیشان اشرف 38 رنز کے ساتھ ٹاپ سکورر رہے،زمان خان نے تین جبکہ محمد عمران اور آصف آفریدی نے دو، دو کھلاڑیوں کو آئوٹ کیا۔