کامن ویلتھ گیمز کے میڈلسٹ اتھلیٹس کا وطن واپسی پر شاندار استقبال  کیا گیا

لاہور(سپورٹس رپورٹر)کامن ویلتھ گیمز میں شاندار کارکردگی دکھانے والے قومی ہیروز سلور میڈلسٹ زمان انور، محمد شریف طاہر اور برانز میڈلسٹ اسد علی کا پاکستان پہنچنے پر شاندار استقبال کیا گیا ۔ ڈی جی سپورٹس کرنل ریٹائرڈ محمد آصف زمان نے اسلام آباد ایئرپورٹ پر کھلاڑیوں کا استقبال کیا۔ کامن ویلتھ میڈلسٹ کو پھولوں کے ہار پہنائے گئے۔اس موقع پر کرنل ریٹائرڈ محمد آصف زمان نے کہا کہ اپنے قومی ہیروز کو خوش آمدید کہتے ہیں، ارشد ندیم، نوح دستگیر بٹ اور دیگر میڈلسٹ کا بھی وطن واپسی پر خود آکر استقبال کروں گا۔ کھلاڑیوں کے اعزاز میں تقریب اور انعامات سے نوازیں گے، گولڈ میڈلسٹ کو 50 لاکھ، سلور کو 20 اور برانز میڈلسٹ کو 10 لاکھ روپے انعام دے رہے ہیں۔قومی ریسلرز نے وطن واپسی پر استقبال پر خوشی کا اظہار کیا۔ کامن ویلتھ گیمز میں پاکستان نصف صدی کی بہترین کارکردگی دکھانے میں کامیاب ہوا،مجموعی طورپر 2گولڈ سمیت 8میڈلز اپنے نام کیے۔برمنگھم کامن ویلتھ گیمز میں مجموعی طورپر 68 اتھلیٹس نے 12 مختلف کھیلوں میں شرکت کی اور2گولڈ سمیت 8میڈلز حاصل کیے، نوح دستگیر بٹ نے 109کلوگرام سے زیادہ ویٹ کیٹیگری میں مجموعی طور پر 405 کلوگرام وزن اٹھا کر نہ صرف سونے کا تمغہ حاصل کیا بلکہ کامن ویلتھ گیمز کا نیا ریکارڈ بھی قائم کیا تھا۔جیولین تھرور ارشد ندیم نے نئے ریکارڈ کیساتھ اتھلیٹکس میں سونے کا تمغہ حاصل کیا،ریسلرز شریف طاہر، انعام بٹ اور زمان انور نے سلور میڈلز جیتے، جوڈوکا شاہ حسین شاہ کیساتھ ریسلرز عنایت اللہ اور علی اسد نے برانز میڈل اپنے نام کیا، پاکستان نے 1970 میں 4گولڈ سمیت 10 میڈلز حاصل کیے تھے، یوں 52سال بعد پاکستان کی ان گیمز میں بہترین کارکردگی سامنے آئی۔مانچسٹر کامن ویلتھ گیمز 2002 میں پاکستانی اتھلیٹس نے 8 میڈلز جیتے مگر اس میں صرف ایک گولڈ شامل تھا، دہلی گیمز 2010 میں 2گولڈ سمیت 5 میڈلز جیتے تھے، ٹریک اینڈ فیلڈ ایونٹس میں ارشد ندیم پاکستان کی تاریخ کے صرف تیسرے اتھلیٹ ہیں جنھوں نے کامن ویلتھ گیمز میں گولڈ میڈل جیتا،1954میں محمد اقبال نے ہیمر تھرو اور 1962 میں غلام رازق نے 120گز ہرڈلز میں سونے کا تمغہ حاصل کیا تھا۔ارشد ندیم 2019 میں نیپال کے شہر کٹھمنڈو میں 86.29میٹر تھرو کے سائوتھ ایشین گیمز کا نیا ریکارڈ قائم کر چکے، اسے انھوں نے ٹوکیو اولمپکس کی تیاری کے دوران ایران میں بہتر کیا تھا،ارشد نے اسی کارکردگی کی بنیاد پر گذشتہ برس براہ راست ٹوکیو اولمپکس کیلئے کوالیفائی کیا جہاں 84.62میٹر فاصلے پر نیزہ پھینک کر وہ پانچویں نمبر پر رہے تھے۔