ارشد ندیم ورلڈ اتھلیٹکس چیمپئن شپ میں ایکشن میں دکھائی دینگے

لاہور(سپورٹس رپورٹر)کامن ویلتھ گیمز گولڈ میڈلسٹ جیولین تھروور ارشد ندیم ورلڈ اتھلیٹکس چیمپئن شپ میں ایکشن میں دکھائی دیں گے، وہ ورلڈ اتھلیٹکس چیمپئین شپ میں شاندار کم بیک کیلئے پر امید ہیں۔وہ ان دنوں پنجاب سٹیڈیم لاہور میں بھرپور ٹریننگ کر رہے ہیں۔ ارشد ندیم 20 اگست کو ہنگری روانہ ہوں گے جہاں چیمپئن شپ کا کوالیفائنگ راو¿نڈ 25 اگست اور فائنل راو¿نڈ 27 اگست کو ہو گا۔ارشد ندیم نے کہا کہ گھٹنے کی انجری سے چھٹکارا پا لیا ہے اور اب بھرپور ٹریننگ کر رہا ہوں، ورلڈ اتھلیٹکس چیمپئن شپ کے بعد ایشین گیمز میں حصہ لوں گا، گھٹنے کی تکلیف کے باعث ایشین چیمپئن شپ مِس کی، امید ہے کہ میں آنے والے ایونٹس میں میڈلز لوں گا۔ میرا بڑا ٹارگٹ اگلے برس ہونے والے پیرس اولمپکس ہیں، پیرس اولمپکس کیلئے مجھے بھرپور ٹریننگ کرنی ہے، حکومت سہولیات تو دے رہی ہے لیکن ورلڈ لیول پر لانے کےلئے مزید بہتر کیا جا سکتا ہے۔ میری اور بھارتی جیولین تھروور نیرج چوپڑا کی ٹریننگ کی سہولیات میں بہت فرق ہے، نیرج چوپڑا کی ٹریننگ مجھ سے بہتر ہے۔