' دشمن ہمیں سمجھنے میں غلطی نہ کرے، مہم جوئی کا بھر پورجواب دینا جانتے ہیں: ائر چیف

کراچی (اسٹاف رپورٹر) پاک فضائیہ کے سربراہ ائیر چیف مارشل سہیل امان نے کہا ہے کہ پاکستان کو اندرونی و بیرونی محاذوں پر بڑے چیلنجز کا سامنا ہے اور ہم کسی کیخلاف جارحانہ عزائم نہیں رکھتے مگردشمن کو کسی بھی مہم جوئی کا جواب اچھی طرح دینا جانتے ہیں، دشمن ہمیں سمجھنے میں غلطی نہ کرے‘ اسے شکست دینے کےلئے پرعزم ہیں۔ایسے دشمن کا سامنا ہے جس کی واضح شکل نہیں ۔ سی پیک کے تناظر میں ساحلی پٹی کی سکیورٹی بہت اہمیت اختیار کرگئی،کیڈٹس ملکی سرحدوں کی جان سے بڑھ کر حفاظت کریں۔ ان خیالات کا اظہار انہوں نے کراچی میں پاک بحریہ کی 106 ویں اور15 ویں شارٹ سروس کورس کی پاسنگ آﺅٹ پریڈ سے خطاب کرتے ہوئے کیا۔تقریب میں نیول چیف ایڈمرل محمد ذکاءاللہ نے بھی شرکت کی۔ پاسنگ آﺅٹ پریڈ میں 70 افسران نے کمشن حاصل کیا اور اےئر چیف نے پاک بحریہ میں کمیشن حاصل کرنے والوں کو مبارک باد دی۔ پاس آﺅٹ ہونے والوں میں 2 خواتین کیڈٹس سمیت یمن کا ایک کیڈٹ بھی شامل ہے۔ ائیرچیف مارشل سہیل امان نے کہا کیڈٹس شاندار روایات برقرار رکھنے کیلئے کوشاں رہیں اور ملکی سرحدوں کی جان سے بڑھ کر حفاظت کریں۔ پاکستان کو اندرونی اور بیرونی محاذوں پر بڑے چیلنجزکا سامنا ہے لیکن ہم کسی بھی مہم جوئی کا جواب اچھی طرح دینا جانتے ہیں اور دہشت گردی کے خلاف آپریشن ضرب عضب میں بڑی کامیابیاں حاصل کیں۔ انہوں نے کہا پاکستان اپنی تاریخ کے نازک دور سے گزر رہا ہے۔ روایتی خطرات غیر متوازن انداز میں بڑھتے جارہے ہیں جب کہ ہمیں ایک ایسے دشمن کا سامنا ہے جس کی کوئی واضح شکل موجود نہیں مگر ہم ملک و قوم کے دشمن دہشت گردوں کیخلاف آخری حد تک لڑیں گے۔ ایئر چیف مارشل کا کہنا تھا اقتصادی راہداری کیلئے گوادرپورٹ بہت اہمیت رکھتا ہے، سی پیک کے تناظر میں ساحلی پٹی کی سکیورٹی مزید اہم ہوگئی ہے۔ ہمسایہ ملکوں سے پرامن تعلقات کے خواہاں ہیں جبکہ دشمنوں کو شکست دینے کے لئے پرعزم ہیں۔ تقریب میں شارٹ کورس کے دوران بہترین کارکردگی کا مظاہرہ کرنے والوں کو اعزازات اور اعزازی شمشیروں سے بھی نوازا گیا۔ایئرچیف نے پاک بحریہ میں کمیشن حاصل کرنے والوں کو مبارک باد دی۔
ایئرچیف