بچوں کے معروف ادیب سید مسعود احمد برکاتی قضائے الٰہی سے انتقال کر گئے

کراچی (نیوز رپورٹر) بچوں کے معروف ادیب وہمدرد نونہال کے مدیر سید مسعود احمد برکاتی قضائے الٰہی سے انتقال کر گئے‘ ان کی عمر 87 برس تھی‘وہ طویل عرصے سے علیل تھے انہوں نے 3 بیٹیاں اور 4 ایک بیٹے کو سوگوار چھوڑا ہے۔ مرحوم گزشتہ 65 سال سے بچوں کے معروف رسالے ماہنامہ ہمدرد نونہال کے مدیر تھے ان کا شمارحکیم محمد سعید کے قریبی ساتھیوں میں ہوتا تھا۔ مسعوداحمد برکاتی ایک علمی خانوادےسے تعلق رکھتے تھے وہ معروف اسکالر‘ محقق طبیب‘ حکیم محمود احمد برکاتی کے چھوٹے بھائی تھے ان کا تعلق ہندوستان کی ریاست ٹونک سے تھا۔ مسعود احمد برکاتی کی نماز جنازہ آج 11 دسمبر کو بعد نماز ظہر ڈیڑھ بجے دن مسجد فلاح نصیر آباد فیڈرل بی ایریا بلاک 14 میں ادا کی جائے گی۔