کراچی (نیوزرپورٹر) حال ہی میں کورونا وائرس کی دوسری لہر کا شکار ہونے والے شوبز انڈسٹری کے سینئر اداکار بہروز سبزواری کورونا سے شفایاب ہوگئے اوراسپتال سے ڈسچارج ہوگئے ہیں۔بہروز سبزواری کے صاحبزادے شہروز سبزواری نے اپنے انسٹاگرام اکائونٹ پر اپنے والد کے چاہنے والوں کے لیے خصوصی اسٹوری شیئر کرتے ہوئے کہا کہ ہم یہاں پر اللہ تعالی کے شکر گزار ہیں کہ جس نے اپنی نبی کے صدقے ہم سب کی دعاؤں کو قبول کرتے ہوئے میرے والد کو صحت و تندرستی عطا کی۔ انہوں نے کہا کہ الحمد اللہ میرے والد صاحب اسپتال سے ڈسچارج ہوکر گھر آگئے ہیں اور اب وہ پہلے سے کافی تندرست اور خوش ہیں۔انہوں نے اپنی انسٹا اسٹوری میں ان تمام لوگوں کا شکریہ بھی ادا کیا جنہوں نے بہروز سبزواری کے لیے دعائیہ پیغامات جاری کیے تھے۔