اپوزیشن دنیا کو فرضی قصے سنا کر سرمایہ کاری کا راستہ بند کررہی ، ان کے کہنے پر ملک ڈیفالٹ نہیں کرے گا : وزیر خزانہ 

لاہور(نیوز رپورٹر) وزیر خزانہ اسحاق  نے کہا ہے اپوزیشن کے کہنے سے پاکستان ڈیفالٹ نہیں کرے گا، سمت درست ہے۔ ڈیفالٹ نہیں کریں گے۔ اسلام آباد میں اسحاق ڈار کے اعزاز میں رہنما اپٹما گوہر اعجاز نے ظہرانے کا اہتمام کیا، جہاں وزیر خزانہ نے گفتگو کرتے ہوئے کہا اپوزیشن دنیا کو فرضی کرپشن کے قصے سنا کر سرمایہ کاری کے رستے بند کر رہی ہے۔ انہوں نے کہا جس رفتار سے ہم پہلے چل رہے تھے، ہمیں جی 20 کا حصہ ہونا چاہیے تھا، آج ہماری معیشت دنیا میں 46 ویں نمبر پر جا پہنچی ہے۔ اسحاق ڈار نے کہا  2013ء میں بھی دنیا کہتی تھی ملک ڈیفالٹ کر جائے گا۔ ہم نے محنت کی، 5 دن میں بجٹ دیا اور ملک کو ڈیفالٹ سے بچایا تھا۔ انہوں نے کہا معیشت کے حوالے سے سابقہ دور ملک کا سیاہ ترین دور تھا، معیشت پر اور تجربے نہیں کر سکتے۔ وزیر خزانہ نے کہا ہم نے 2013ء سے 2016ء تک اپنا پروگرام مکمل کیا جو ملک کی تاریخ میں ایک بار ہی ہوا ہے۔ اب ہمیں میکرو اکنامک انڈیکیٹرز کو بہتر بنانا ہوگا۔ انہوں نے کہا اپوزیشن سیاست کے لیے غیرسنجیدہ بیانات دے رہی ہے، اپوزیشن کے غیرسنجیدہ بیانات سے پاکستان کی ساکھ کو نقصان پہنچ رہا ہے۔ انہوں نے کہا کہ ہم نے بغیر سوچے سمجھے روپے کی قدر کم کی، ملک سے گندم کی سمگلنگ کو جنگی بنیادوں پر روکنا ہوگا۔ انہوں نے مزید کہا مالی انتظام بہتر کرنے کی پاداش میں 5 سال جلا وطنی گزاری، میرے ساتھ دہشتگردوں جیسا سلوک کیا گیا۔