لاہور (نامہ نگار) مغلپورہ کے علاقے میں آٹو مارکیٹ کے قریب سیوریج لائن میں گیس بھر جانے سے دھماکا ہوا۔ جس کی زد میں آ کر 5 افراد زخمی ہو گئے۔ دھماکے سے علاقے میں خوف و ہراس پھیل گیا۔ زخمی ہونے والوں میں 23 سالہ علی رضا، 35 سالہ بلال، 30 سالہ بلال احمد، 45 سالہ آصف اور 28 سالہ فرحان نصیر شامل ہیں۔ دھماکے سے مارکیٹ کی سیوریج لائن تباہ ہو گئی۔ گزرتی گاڑیوں اور دکانوں کو بھی نقصان پہنچا۔ مارکیٹ کے صدر میاں اشتیاق نے کہا زوردار دھماکے کے باعث گٹر کے ڈھکن کئی فٹ تک ہوا میں اڑے۔ عینی شاہدین نے کہا یہ دھماکہ گیس بھرنے کے باعث نہیں ہوا۔ مارکیٹ کے دکانداروں نے اعلٰی حکام سے واقعہ کی انکوائری کا مطالبہ کیا ہے۔