لندن (صباح نیوز)برطانیہ میں طوفان ایرک نے تباہی مچا دی ، ایرک طوفان کے دوران حادثات میں دو افراد ہلاک ہوگئے۔ غیرملکی خبررساں ادارے کے مطابق طوفان ایرک برطانیہ کے مشرقی و مغربی شہروں سے ٹکراگیا جس کے باعث اسکاٹ لینڈ، شمالی آئرلینڈ سمیت دیگر ملکوں میں 70میل فی گھنٹہ کی رفتار سے چلنے والی تیز ہوائوں اور طوفانی بارش نے کئی عمارتوں کو نقصان پہنچا یا، درخت اور پول گر گئے ۔مختلف حادثات میں دو افراد ہلاک ‘ کئی زخمی ہوئے۔ طوفان ایرک کے باعث ٹریفک کی روانی بری طرح متاثر ہوئی‘ پروازیں اور ٹرین سروس روک دی گئیں ۔ بارشوں اورتیزہوائوں کے باعث ویلز،جنوبی انگلینڈاورشمال مغرب میں سیلاب کاخطرہ ہے جبکہ انتظامیہ کی جانب سے مختلف مقامات پر ایمرجنسی نافذ کردی ہے۔ محکمہ موسمیات کے مطابق تیزہوائوں،بارش کاامکان ہے جنوبی انگلینڈ میں کہیں کہیں برفباری کا امکان بھی ہے۔ محکمہ موسمیات نے وارننگ جاری کردی۔