گوجرانوالہ: عام انتخابات ،کہیں مٹھائیاں تقسیم تو کہیں چہرے افسردہ 

گوجرانوالہ (نمائندہ خصوصی ) عام انتخابات 2024میں کامیاب اور ہارنے والے امیدواروں کے ڈیروں پر دوسرے روز بھی ووٹرز کا تانتا بندھا رہا۔کہیں مٹھائیاں تقسیم تو کہیں چہرے افسردہ دکھائی دئیے ۔چالاک ووٹرز بھی مخالف کو مبارکباد دینے پہنچ گئے۔ تفصیلات کے مطابق ملک بھر کی طرح گوجرانوالہ میں بھی عام انتخابات 2024اختتام پذیر ہو گئے ہیں ۔ ان انتخابات میں کامیاب اور ہارنے والے امیدواروں کے ڈیروں پر دوسرے روز بھی لوگوں کا تانتا بندھا ہوا ہے ، فاتح امیدوار وں کے ڈیروں پر خوشی کا سماں ہے ہر آنیوالے کو مٹھائی کھلا کر منہ میٹھا کروایا جا رہا ہے اور مخالف امیدواروں کے ڈیروں پر ووٹرز کے چہرے افسردہ دکھائی دے رہے ہیں۔ جبکہ کچھ ایسے بھی چالاک ووٹرز تھے جنہوں نے اپنے ہارنے والے امیدوار کے پاس جانے کی بجائے فاتح امیدوار کے ڈیروں کا رخ کیا جہاں پر انہوں نے جیت کی خوشی منائی اور ووٹ دینے کی خوب کہانیاں بھی سنائیں اور یہ ظاہر کرتے رہے کہ جیت کیلئے انہوں نے بے حد محنت کی تھی ۔