پشاور + مردان (این این آئی) مردان کے علاقے شاہ ڈھنڈ بابا میں غازی بابا کے مزار کے دو مجاوروں کو نامعلوم ملزمان نے فائرنگ کر کے قتل کر دیا ۔ شاہ ڈھنڈ بابا میں غازی بابا کا مزار واقع ہے جہاں پر چند ملنگ رہتے ہیں۔ گذشتہ رات نامعلوم ملزمان نے مزار کے احاطے میں گھس کر مہر ولد مکمل شاہ، ساجد کو فائرنگ کر کے قتل کر دیا۔ پولیس نے نامعلوم ملزمان کے خلاف مقدمہ درج کر کے تفتیش شروع کر دی۔ علاوہ ازیں پشاور کے علاقے سربند میں پولیس چیک پوسٹ پر شدت پسندوں نے حملہ کر دیا، جوابی کارروائی میں ایک حملہ آور مارا گیا۔ ذرائع کے مطابق شدت پسندوں نے سربند کے علاقے میں منظور شہید چیک پوسٹ پر بھاری ہتھیاروں سے فائرنگ کی، پولیس کی جوابی کارروائی میں ایک حملہ آور جاں بحق ہو گیا، باقی فرار ہونے میں کامیاب ہو گئے۔ پولیس نے مزید نفری طلب کر کے علاقے کو گھیرے میں لے لیا اور سرچ آپریشن شروع کر دیا گیا۔