لاہور (آئی اےن پی+ نوائے وقت رپورٹ) پنجاب میں تین روز ہ انسداد پولیو مہم آج ( پیر) سے شروع ہو گی ۔ 11سے 13جنوری تک جاری رہنے والی پولیو مہم کے دوران محکمہ صحت کی ٹیمیں گھر گھر جا کر پانچ سال تک کی عمر کے بچوں کو پولیو سے حفاظت کی ویکسین پلائیں گی۔ وزیر اعلیٰ کے مشیر برائے صحت خواجہ سلمان رفیق نے بتایا مہم میں پانچ سال سے کم عمر کے تقریباً ایک کروڑ 80 لاکھ بچوں کو قطرے پلاے جا ئیںگے۔ مہم کے لیے صوبہ بھر کی 3522 یونین کونسلز میں 42ہزار سے زائد ٹیمییں تشکیل دی گئی ہیں جن میں موبائل، ٹرانزٹ اور فکسڈ سائٹس کی ٹیمیں شامل ہیں۔ سیکرٹری صحت علی جان خان نے کہا گزشتہ مہمات کے اعدادوشمار کی روشنی میں رہ جانے والے بچے اور علاقوں پر خاص توجہ دی جاے گی۔انہوں نے پولیو پر قومی ایکشن پلان کے مطابق سٹاف کو روزانہ کی بنیاد پر جائزہ میٹنگز کی ہدایات جاری کیں۔ ڈائریکٹر ای پی آئی ڈاکٹر منیر احمد نے بتایا دوسرے صوبوں کے بارڈر پر واقع اضلاع جہاں سے بین الصوبا ئی نقل و حمل کے اہم راستے ہیں پر خاص توجہ دی جا رہی ہے۔ دوسری طرف قبائلی اور نیم قبائلی علاقوں میں بھی 4 روزہ انسداد پولیو مہم آج شروع ہو گی۔ 10 لاکھ 48 ہزار بچوں کو انسداد پولیو کے قطرے پلائے جائیں گے۔ 371 ٹیمیں تشکیل دے دی گئی ہیں۔
انسداد پولیو مہم