گوادر (نوائے وقت رپورٹ) بلوچستان میں پھر دہشت گردی ہوئی ہے۔ ضلع گوادر کے شہر تربت میں ہونے والے دھماکے میں چھ افراد زخمی ہو گئے ہیں۔ تربت پولیس کے مطابق اتوار کی صبح سینما چوک پر دھماکہ ہوا۔ دھماکے کے نتیجے میں چھ افراد زخمی ہوئے جبکہ دو گاڑیوں کو جزوی نقصان پہنچا۔ پولیس کا کہنا ہے کہ دھماکے سے متعلق مزید تفتیش کا آغاز کر دیا گیا ہے۔ سکیورٹی فورسز نے علاقے میں سرچ آپریشن کاآغاز کر دیا ہے جبکہ زخمیوں کو طبی امداد کیلئے  سول ہسپتال منتقل کیا گیا جہاں ایک زخمی کی حالت نازک بتائی جاتی ہے۔ واضح رہے کہ گزشتہ ماہ صوبہ بلوچستان کے مختلف علاقوں سے پانچ افراد کی لاشیں برآمد ہوئی تھیں۔ تمام افراد کو گولیاں مار کر قتل کیا گیا تھا۔ ان تمام افراد کو ضلع تربت میں موت کے گھاٹ اتارا گیا۔