لاہور(نامہ نگار+سپورٹس رپورٹر+نوائے وقت رپورٹ) قذافی سٹیڈیم کے قریب کرکٹر شعیب ملک کی گاڑی کو حادثہ پیش آیا۔ شعیب ملک محفوظ رہے جبکہ گاڑی کا اگلہ حصہ تباہ ہو گیاہے۔ تفصیلات کے مطابق شعیب ملک کی گاڑی سڑک کنارے کھڑے ایک ریسٹورنٹ کے لوڈرٹرک سے ٹکرا گئی۔ وہاں کھڑی ایک اور کارکو بھی نقصان پہنچا۔ شعیب ملک پی ایس ایل ڈرافٹنگ کی تقریب کے بعد نیشنل ہائی پرفارمنس سینٹر سے نکل رہے تھے۔ حادثے کے بعد شعیب ملک واپس نیشنل ہائی پرفارمنس سینٹر چلے گئے۔عینی شاہدین کے مطابق شعیب ملک بہت تیزرفتاری سے کار چلانے اورکرتب دکھاتے ہوئے آرہے تھے۔ادھر کرکٹر شعیب ملک نے کار حادثے پر کہا کہ میں بالکل ٹھیک ہو ں، حادثہ اتفاق سے پیش آیا،اللہ تعالیٰ نے مجھ پر مہربانی کی ۔ میری خیریت دریافت کرنیوالوں کو شکریہ ادا کرتاہوں۔ادھر پولیس کے مطابق شعیب ملک کی سپورٹس کار نے 3گاڑیوںکو ٹکرماری،متاثرہ گاڑیوںکے مالکان کے بیانات قلم بند کرلئے گئے اور انہیں قانونی کارروائی کی یقین دہانی کرائی ہے۔ ذرائع کے مطابق شعیب ملک کی گاڑی پی سی بی ملازمین کی پارکنگ میں کھڑی کردی گئی۔ پولیس کا کہنا ہے کہ متاثرہ گاڑیوں کے مالکان کی درخواستیں ملنے پر کارروائی کی جائے گی۔