کراچی(اسٹاف رپورٹر)پاکستان پیپلزپارٹی سندھ کے صدر نثاراحمدکھوڑو نے کہا ہے کہ قائد عوام ذوالفقار علی بھٹو نے عوام کو سیاسی شعور دیا،بلاول بھٹو نا نا کے پیش رو ہیں والدہ کے ادھورے مشن کی تکمیل کر رہے ہیں، ذہین لیڈر بن کر سامنے آئے ہیں ۔ انہوں نے یہ بات آل سندھ پیرا میڈیکل اسٹاف کی جانب سے این آئی سی ایچ میں منعقدہ قائد عوام کی 95ویں سالگرہ کے موقع پر تقریب سے خطاب کرتے ہوئے کہی۔ رکن قومی اسمبلی قادر مندوخیل ، ایم پی اے سعدیہ جاوید ، ایم پی اے شمیم ممتاز، صدر آل سندھ پیرا میڈیکل اسٹاف سلمان میمن اور دیگر نے بھی خطاب کیا۔ نثار کھوڑو نے کہا کہ پی پی پی کراچی سے بھی کلین سوئپ کرے گی۔ میئر جیالا ہوگا۔ کام کیا ہے شہر کو ہمارے ایڈمنسٹریٹر نے ڈیلیور کیا۔ قائد عوام کے منشور اور فلسفہ پر کاربند ہیں۔ انہوں نے کہاکہ قائد عوام نے پاکستان کو متفقہ آئین دیا۔ پاکستان کو ترقی کی راہ پر گامزن کیا۔ فرانس سے ایٹمی ری ایکٹر پلانٹ لائے ۔ اسٹیل مل لگائی ۔ شہیدمحترمہ انکی پیش رو تھیں ۔ بلاول بھٹو نے پارٹی میں ایک نئی روح پھونکی۔ پی پی پی پورے ملک میں مستحکم ہو رہی ہے۔ 15جنوری کا الیکشن نئی تاریخ رقم کرے گا۔ نثار کھوڑو نے کہا کہ سندھ کے شہری علاقے بھی اب پی پی پی کا گڑھ ہیں اور نوجوان تیزی سے پی پی پی میں شامل ہورہے ہیں۔ پی پی پی کے پیرا میڈیکل اسٹاف ، لیبر بیورو سب مضبوط ترین شعبے ہیں ۔ رکن قومی اسمبلی قادر مندوخیل نے کہا کہ پیپلز پارٹی ملک کی واحد جمہوری قوت ہے۔ جس نے جمہوریت کے لئے شہادتیں قبول کیں ۔ ملک کو صوبائی خود مختاری دی اور جمہوری طریقہ کار سے عمران خان کو تحریک عدم اعتماد سے فارغ کیا۔ پاکستان کو بحران سے نکالنے کے لئے میدان عمل میں ہیں۔ انہوں نے کہا کہ اگلا الیکشن پی پی پی جیتے گی وزیر اعظم بلاول بھٹو ہوں گے۔ایم پی اے سعدیہ جاوید نے کہا کہ قائد عوام کا نعرہ حق و سچ پر مبنی تھا۔ پی پی پی کو ختم کرنے والے خود ختم ہوگئے۔ بلاول بھٹو والدہ اور نا نا کے مشن کی تکمیل کے لئے بہترین کردار ادا کر رہے ہیں ۔انہوں نے کہا کہ ملک کو گرے لسٹ سے نکالا مشکلات سے بھی نکالیں گے۔ قائد عوام کے مشن کے ساتھ ہیں ۔ ایم پی اے شمیم ممتازنے کہا کہ پیپلز پارٹی کی کامیابی کا دور شروع ہو چکا ہے ۔ پندرہ جنوری کو تیر پر ٹھپے لگا کر عوام پی پی پی پر اعتماد کا اظہار کریں گے۔ ترقی پی پی پی ہی کی مرہون منت ممکن ہے۔ انہوں نے کہا کہ خواتین پی پی پی کا ہر اول دستہ ہیں ۔ آل سندھ پیرا میڈیکل کے سندھ کے صدر سلمان میمن نے کہا کہ ہم سب بھٹو کے متوالے ہیں جیالوں کی جان بلاول بھٹو ہیں۔ قائد عوام ذوالفقار علی بھٹو مشعل راہ ہیں ۔ جیالے تیر پر مہر لگا کر میئر جیالا لائیں گے۔ انہوں نے کہا کہ بلاول بھٹو نے ملک کا نام نا نا کی طرح روشن کیا۔ نریندر مودی کا چہرہ بے نقاب کیا۔ پی پی پی میں پیرامیڈیکل اسٹاف میں جیالے ہی جیالے ہیں اور وہ پی پی پی کا سرمایہ ہیں ۔
نثارکھوڑو