میونسپل کمیٹی کے ڈیلی ویجز سوئیپرز  کا ٹھیکیدار کے خلاف مظاہرہ

ٹنڈوآدم(نامہ نگار)ٹنڈوآدم میں میونسپل کمیٹی کے ڈیلی ویجز سوئیپرز ملازمین تنخواہیں نہ ملنے کے خلاف احتجاجی مظاہرہ، ٹھیکیداروں کے خلاف شدید نعرے بازی۔ تفصیلات کے مطابق ٹنڈوآدم بلدیہ کے ٹھیکیداری سسٹم کے تحت ڈیلی ویجز سوئیپرز کا محمدی چوک سے پریس کلب تک احتجاجی ریلی نکالی گئی اور ٹھیکیداروں کے خلاف شدید نعرے بازی کی، اس موقع پر علی رضا بالا شاہی، روشن مسیح،وکرم و دیگر نے صحافیوں سے گفتگو کرتے ہوئے کہاکہ حکومت سندھ کی جانب سے اعلان کردہ کم سے کم تنخواہ 25 ہزار کرنے کے باوجود ہمیں 15 ہزا تنخواہ دی جا رہی ہے،  ٹھیکیدار ہمیں ہر ماہ دیر سے تنخواہیں دیتے ہیں تنخواہیں نہ ملنے کے باعث ہمارے بچے فاقہ کشی پر مجبور ہیں ہمیں ڈیلی ویجز پر کام کرتے ہوئے چھ سال ہو گئے ہیں ہمیں کنفرم کر کے ہماری تنخواہیں بڑھائی جائیں بصورت دیگر احتجاج کا دائرہ وسیع کیا جائے گا جس کی تمام طر ذمہ داری انتظامیہ پر عائد ہو گی۔