پیر کی صبح دس بجے کے قریب اسلام آباد ہائی وے سے کچھ ہی فاصلے پر واقع سہالہ باغ کے علاقے میں آرمی ایمیونیشن سٹور میں تین دھماکے ہوئے جن کے نتیجے میں ایک اہلکار شہید اور تین زخمی ہوگئے جنہیں سی ایم ایچ منتقل کردیا گیا ھے۔ دھماکوں کے نتیجہ میں اسلحہ ڈپو کو آگ نے اپنی لپیٹ میں لے لیا جسے بجھانے کے لئے امدادی کارروائیاں فوراً شروع کردی گئیں جبکہ دھماکوں سے بیرک کی چھت بھی گر گئی۔ امدادی کارروائیوں میں سول انتظامیہ کو حصہ نہیں لینے دیا گیا اور تمام ریسکیو آپریشن آرمی نے خود کیا۔ واقعہ کے فوراً بعد علاقے کو مکمل طور پر گھیرےمیں لیا گیا جبکہ میڈیا کو بھی جائے وقوع سے تقریبا ایک کلومیٹر دور روک دیا گیا۔ عینی شاہدین کے مطابق دھماکے اتنے زور دار تھے کہ علاقے میں خوف و ہراس پھیل گیا ،عینی شاہد نے انکشاف کیا کہ تین بڑے دھماکوں کے بعد فائرنگ کی آوازیں بھی سنائی دیں۔ دوسری جانب آئی ایس پی آر کی جانب سے جاری بیان میں کہا گیا ھے کہ اسلحہ یونٹ میں ھونے والا دھماکہ حادثاتی تھا تاہم بیان میں دھماکے کی جوہات نہیں بتائی گئیں۔