گوجرانوالہ: کوریئر کمپنی نے ہیروئن کینیڈا سمگل کرنے کی کوشش ناکام بنا دی

گوجرانوالہ (نمائندہ خصوصی ) گوجرانوالہ میں کورئیر سروس کے دفتر سے لو ہے کے نٹ بولٹ میں چھپائی گئی ایک کلو گرام ہیروئین پکڑ لی گئی ۔ پولیس کے مطابق پرانا ریلوے اسٹیشن دفتر کے سامنے واقع کورئیر سروس کمپنی کے دفتر میں ایک شخص نے لوہے کے نٹ بولٹ کینیڈا بھجوانے کے لیے بکنگ کروائی تو عملے نے قواعد و ضوابط کے مطابق سامان میں ممنوعہ چیز نہ ہونے کا حلف نامی بھی جمع کروانے کا کہا جس پر بکنگ کروانے والا شخص کچھ دیر بعد آنے کا کہہ کر چلا گیا اور واپس نہیں آیا۔کورئیر سروس کے عملے نے پولیس کو بلایا جس پر پولیس نے نٹ بولٹس کا معائنہ کیا اور شبہ ہونے پر نٹ بولٹ کو توڑا گیا تو اندر سے ایک کلو 65 گرام ہیروئن برآمد ہوئی۔ کورئیر گرجاکھ کے رہائشی سجاد نامی شخص کی طرف سے کینیڈا میں مقیم پاکستانی شبیر احمد کے نام پر پارسل بک کروایا گیا تھا۔ پولیس نے مقدمہ درج کرکے سجاد نامی ملزم کی تلاش شروع کر دی۔